Aruba Investment Agency a reuni cu varios inversionista

• Tuesday, 03 July 2012 19:26

  Riba diabierna 22 di juni, EPD Management Consultancy a organisa pa prome biaha e CAReKINE Business Summit na e oficina principal di ABN-AMRO na Amsterdam. E evento aki tawatin como focus con e paisnan den reino Hulandes por facilita inversionista den e expansion di nan actividadnan economico den e region di Caribe y Latino America. Entre a varios presentadornan durante e dia aki, tawata presente Minister Plenipotenciario di Aruba y di St. Maarten, Mr. Edwin Abath y Mr. Voges. E delegacion di Aruba tawata consisti di representantenan di Aruba Huis y Aruba Investment Ageny (Arina). Den e presentacion di Aruba, Minister Plenipotenciario Abath a enfoca riba e vision di Aruba pa funciona como e ‘Green Gateway’ den e region di Caribe y Latino America y e beneficionan cu Aruba ta ofrece den e funcion aki, especialmente riba e tereno di Green Energy y Technology. E publico presente a ricibi e presentación di Aruba cu hopi entusiasmo y elogio. Arina a reuni cu un cantidad relativamente grandi di compania. Tawatin un interes grandi mei mei di tur compania pa di un manera of otro conduci actividad economico na of via Aruba. E calidad di compania cu tawata presente durante e evento aki, tawata di un standard hopi halto y seguramente varios di e reunionan entre e companianan y Arina lo resulta den projectonan concreto cu lo tuma luga na Aruba pronto. Source: http://www.24ora.com/index.php?option=com_content&view=article&id=49646%3Aaruba-investment-agency-a-reuni-cu-varios-inversionista-&catid=1%3Alocal&Itemid=5